Isa ang hayskul sa mga makukulay na yugto ng
ating buhay, dito nararanasan natin ang mga bagay na di natin kalianman
naranasan sa elementarya o maging sa kolehiyo. Sabi nga nila, ang hayskul daw
ang pinakamasayang parte ng pag-aaral. Ang karanasang lumabas sa mundo ng
kamusmusan at walang kamalayan. Hayskul ang yugto ng buhay kung saan matututo
kang maging tamad, ma-inlove, makipag-away at makakahanap ng mga tunay na
kaibigan.
Masaya nga ang buhay hayskul, dahil sa mga
nagliliparang tsismis at mga di mapigil na mga halakhak kapag kasama mo ang
iyong mga kaibigan, mga kwentong walang
kabuluhan ngunit nakakatawa parin. Ganoon na rin ang mga kaba-moments kapag
exams lalo na kapag nalimutang magreview, kaya`t kahit paminsan-minsa`y
humahaba ang leeg at nagiging magnifying glass ang mga mata. Kailan ba nawala
ang usapang pag-ibig sa hayskul? Nagsimula sa simpleng crush, mutual na
pagtingin hanggang sa maging magkasintahan. Madalas ring maging tambayan ang comfort room upang madaanan si crush sa
kanilang klassrum sabay tili at yakap sa katabi. Di rin nawala ang ¼ sheet of paper charity events pagdating ng
pagsusulit at nakawan ng ballpen. Yung mga estudyanteng pagdating sa klassrum
sisigaw ng “Sinong may assignment? PAKOPYA” kasi nag COC magdamag.
Nakaupo sa unahan ang mga estudyanteng nais
matuto habang sa hulihan naman ang mga estudyanteng patagong kumakain,
natutulog at naglalandian. Sa hayskul mo rin mararanasan ang iba`t ibang uri ng
quiz, long quiz, surprise quiz at open note quiz. Kapag walang magawa, makikita
mo ang mga estudyanteng nakaupo sa bawat sulok ng klassrum nanunuod ng pelikula
sa laptop, naglalaro o nagseselfie sa cellphone, nagbubulungan, nagtatawanan,
may nakataas ang paa at may mga natutulog sa sahig nakakumot ng manila paper.
Isang grupo na may walong estudyante ang magpapaalam na pupunta sa CR at
babalik kapag matatapos na ang klase. Hingian ng polbo at pabango, walang tigil
na tilian sa classroom, mga wacky pose, extension ng deadlines at panlilibak sa
mga kinaiinisang guro.
Hindi rin palaging masaya ang buhay sa
hayskul, may mga gurong nagbibigay ng isang bundok ng takdang-aralin at
projects, pagpupuyat makatapos lang ang research proposals, overnight practice
tuwing may PE presentations, paghahabol ng deadlines at madugong pag-aaral sa exams,
surprise reports at marami pang iba.
Bilang isang studyante wala namang pumipigil
sa ating maging masaya, ang mahalaga ay alam natin ang ating mga limitasyon at
responsibilidad. Mahalaga ang bawat karanasan at aral na pinunla ng mga taong nangangarap na magkaroon tayo ng
magandang kinabukasan at ng mga taong tinulungan tayong maabot ang hagdan ng ating mga pangarap at naging parte
ng ating paglalakbay.
-Isinulat ni: Karla Marsia S. Uno-
Naalis ng may-ari ang komentong ito.
TumugonBurahinAng ganda ng story pag balik tanaw ang daming kong natutunan
TumugonBurahin